الفلفل و الشطة

كثير من الشباب اليومين دول يقول لك :
" أنا حلمي أتجوز واحدة مش رغاية مش كل شوية ترغي معايا بقى في كلام تافه..
كمان نفسي أتجوز واحدة تكون هادية وفي حالها و مع نفسها ...الخ"
يرون ان تلك صفات فتاة مثالية .. فتاة خيالية ...
ولكن.....
***********
***********
لو تزوج تلك الفتاة التي هي ليس لها في أي شئ سيشعر بالشلل و الملل..
لي نظرية أقتبستها من ماري منيب التي كانت تقول:" الفلفل والشطة هما اللي بيزودوا نار الحب"
أنا موافق على تلك المقولة جداً..
الحياة حلاوتها في الصراع... في الحزن و الفرح معاً
الفرح على الدوام يخلق الملل..
و الملل اذا ذاد يخلق الحزن ..
و الحزن بداية الاكتئاب
و الاكتئاب هو أول خطوات الانتحار..
لو تزوجت اللي هيا في حالها ستشعر بالبرود في حياتك..
تريدها لا تغير؟؟
ماشي.. لو شافتك مع مين مش هتغير .. هتقول دي يمكن واحدة زميلته في الشغل او زميلته في الدراسة من زمان مفيش مشاكل..
مش هتشعر بإنها بتحبك ... لأن اللي بيحب لازم يغير على اللي بيحبه
لو رجعت من الشغل هتسيبك في حالك..
مش هتسألك عملت إيه ولا جيت منين ولا رحت فين..
مبسوط يا عم؟؟
مش عارف هتكون ازاي مبسوط ؟
الطبيعي ان الواحد لما يحب بيكون متلهف على أحوال اللي بيحبه .. بكده ممكن تحس انها منفضه لك وانت مش فارق معاها أصلا

كمان مش هتقول لك على اللي حصل و مش هتدوشك(( بمشاكلها التافهة))..
كده انت مبسوط؟؟
برضه أنا مش عارف انت ليه مبسوط؟
كده هتحس إنها مش بتعتبرك ملاذ ليها ومصدر أمان ليها... لإنك باختصار مش بتساهم في شئ في حياتها
و الراجل الطبيعي يحب يكون كل شئ في حياة زوجته.. يكون هو اللي بيحتويها ..

لو كنت تريد امرأة باردة فلتبحث.... ولكن صدقني ستندم يا صاحبي

المدح بالعبيط

وأنا في إعدادي.. كنا عاملين في المدرسة دوري كرة قدم..
قلت أشترك.. (مع العلم إني مش حريف وبألعب كورة عادي جداً.. وأكبر مهاراتي إني أباصي الكورة صح)
أشتركت في فريق ما.. ولعبت أول مباراة…لم أفعل شئ في تلك المباراة .. و كتير كانت بتقلش مني كمان..
المهم.. في آخر الماتش جات لي كورة قدام رجلي.. وقفت تحت رجلي..
لقيت واحد صاحبي فاضي قدام الجون..
قلت أباصيها له .. باصيتها له ..
جاب جون….
طبعاً فرحنا وزقططنا و.. و…
ثم بعد المباراة قالوا لي: " أنت لعيب حريف أوي يا أحمد.. كنت مخبي المهارات دي كلها فين؟؟ "
أندهشت ..

فأنا واثق أن في الأمر خطأ ما.. ربما يسخرون مني ( بيشتغلوني يعني )
فأنا لم أفعل شئ في المباراة بالمرة .. ليس تواضع والله .. بل بجد فعلاً.. لم أفعل شئ بالمرة..
ولكنهم يمدحوني لا أعرف لماذا..
وأستمر الحال هكذا طوال الدوري.. ألعب عادي جداً جداً .. و لكنهم يقولون أني ماهر..
حتى أنني مرة كنت أمام مرمى الفريق الخصم..
جائت لي كرة طويلة وقفت تحت رجلي
حطيتها في الجون..
طبعاً هيصت .. وفرحت ولكن…
بعد الماتش أشعروني أني بطل قومي.. وأنا لم أفعل سوى ان أودعت كرة فاضية في مرمى فاضي في الجون..
حتى في حصة العلوم.. كان مدرس العلوم بيقول عن كرة القدم:
" لاعب كرة القدم لا يمكن يكون حريف إلا لو كان أنكله مرن ( أنكل القدم ) ومن اللاعبين اللي انا شفتهم في دوري المدرسة واللي انا شايف ان انكلهم مرن ….. و….. و…… و احمد علاء و… و.."


في النهاية أقتنعت من داخلي أنني أنني ماردونا النيل..
ولكني سرعان ما أكتشفت أنهم كانوا لا يفهمون شيئاً .. أكتشفت هذا حين لاعبت مستويات أعلى..
وطلعت أنا وجهة نظري صح
.. انا ما كنتش حريف…
هما اللي كانوا عيال عبيطة..
***********************
***********************

حكاية المدح بما لا يستحق المرء تتكرر مع كثير من الناس وليس أنا فقط…
لا أقصد الهزاربالمدح..
ولكن المدح الحقيقي..
أحيانا عندما تقوم بعمل download لصورة من على النت يقولون لك : " أنت عبقري" ..
هذا لأنه لا يعرف شئ في الكمبيوتر اصلا
وأحيانا عندما يقول لك رجل جوارك في الأتوبيس " ممكن تخليني أعدي " .. وتعديه فيقول لك :
" ربنا يبارك لك ويكتر من أمثالك"
لمجرد أنك أزحت جسمك قليلاً حكم عليك بالبر والصلاح وحب الخير
وحين تكتب موضوع عبيط سطحي ساذج في منتدى ما يقولون لك:
" رائع .. موضوع تحفة .. أنت دماغك عالية.. أنت عبقري .. أنت رائع "
و حين يسدد اللاعب الغبي كره غبية تبعد عن المرمى ب200 ياردة فوق يقول المعلق:
" ياااااااااااااااااااااااااااااااااااااااااااااه.. حلوة حلوة حلوة حلوة .. هي دي المتعة "
و حين تتوقع شئ ما بالصدفة البحتة و يحدث.. تجدهم يصفونك بأنك سابق لعصرك..
و..
و..
و…
الأمثلة كثيرة…
الناس يا إما مغفلين يا إما مجاملين بشكل ممل..
إن هذا المدح الذي هو في غير مناسبته يجعل الشخص الذي مدحه الناس أحياناً يصاب بالغرور..
أو بالسعادة و يشعر أنه قد وصل لقمة المجد ..
ولكنه حين يخرج للمستويات الأعلى يحبط…



يا ريت نهدأ شوية يا جدعان
وبلاش إسهال المدح ده ..
يا ريت نعطي كل شخص حقة بالتمام والكمال
و لا نصنع من العاديين أبطالاً من لا شئ

نظرية العكس عكاس

في الافلام العربي الفاشلة ...
يكون البطل لسة مرتكب الجريمة .. يروح البوليس ييجي على طول..
و يوم ما الشرير يكون بيجري ورا البطل .. البوليس تلاقيه مختفي تماماً..
حتى لو أتصل بيه البطل .. ييجي بعد 100 سنة :huh: ..
.. و بالمثل الدنيا أحياناً..
ساعات كتير أجي أعمل الحاجة الاقي العكس أسهل لي ..
ويوم ما أحب أعمل العكس.. ألاقي الحاجة اللي أنا كنت عاوزها قبل كده..
على سبيل المثال...
فيه ميكروباص عندنا بيروح من شارع الزهراء الى شارع العشرين و العكس..
يوم ما أروح الزهراء ألاقي كل الميكروباصات اللي رايحة العشرين كتير
ويوم ما أروح العشرين الاقي كل الميكروباصات اللي رايحة الزهراء كتير
..
في الكلية لما أكون معايا الكارنية و لا حد بيعبرني وبيسألني عليه
ويوم ما أنساه أحس إني داخل على قاعدة نووية .... تفتيش ولا تفتيش الوكالة الدولية للطاقة الذرية ..
يوم ما يكون معايا فلوس كتير عشان محتاط للمواصلات بأركب بسهولة مواصلات رخيصة
و يوم ما بأنسى و أنزل من غير فلوس كتير ألاقي المواصلات واقفة و لازم تركب مواصلات كتييييير عشان توصل للبيت
و هكذا ... دي أنا بأسميها نظرية العكس عكاس
يعني الدنيا تمشي معاك بالعكس ...


الكلام ده كتبته لآخذ السبق في تسجيل النظرية فقط لا غير B)

Any One Can Cook

Any One Can Cook أو .. " أي أحد يستطيع الطهي"
الجملة دي إتقالت فين؟؟؟
فين ؟؟ فين ؟؟
فيه بعض عارف .. والبعض الآخر لأ...
أحب أقول للبعض اللي مش عارف إنها أتقالت في فيلم Ratatouille.. اللي في الصورة ..
مش هأحكي قصة الفيلم .. عشان القصة طويلة .. بس حابب أتكلم عن الفكرة ..
فكرة Any One Can Cook
كانت هناك إحدى الجمل التي تقال في الفيلم عن طريق الشيف الكبير صاحب المطعم :
" ضع توابل (...) .. هل تريد أن تعرف الكمية ؟؟ لا يهم أن تعرف.. جرب أنت وحظك.. لا تخف من فساد الطبخة .. إن الفاشلون هم من لا يجربون .. الأكلة تزداد جمالاً كلما جازفت في طريقة تحضيرها الطبخ لا يحتاج علم بقدر ما يحتاج شخص مغامر"
عجبني كلام الراجل ده أوي ... مش فكرة طبقته على الحياة... أنا طبقته على الأكل ...
جربت ... ونجحت
بقيت بأعك عك الدنيا .. ويطلع الأكل جامد موللة d:
أنا عن نفسي عندي استعداد فطري لأن أعك وأغامر في عمل الأكل..
كثير من المقربين لي يعرفون أني اعشق وضع المكرونة على الملوخية ...
ومن أكلاتي العبقرية الفول باللانشون والجبنة الرومي..
و الكفتة بالجبنة المثلثات ( جبنة طعمة للجهلة )..
و المسقعة بالجبنة .. و المكرونة بالجبنة .. مش الأكلة الإيطالية إياها .. فتلك شئ آخر..
أنا بأجيب جبنة استامبولي من التلاجة و أحطها على المكرونة
مممممممم.. لذيذة بشكل...
أنا جعت يا جماعة
يا ريت حد يفكر في كلام الراجل..
إنت عارف؟؟
ده فيه فار في الفيلم بقى طباخ ممتاز .. مش أكتر من إنه سمع كلام الراجل وإعتمد على شجاعته
عيب في حقك لما فار يعرف يطبخ وانت لأ.. وأفتكر كلام الراجل كويس.. الفاشل هو الجبان





بس خلاص!!!!!!!!!!!

العنوان الأول ولا الفكرة ؟؟

الطبيعي ان الواحد يكتب فكرة او موضوع او شعر او خاطرة أو.. أو ...
ثم بعد ما يخلص يختار عنوان لما كتب...
لكن يحصل ايه لو جربت تكتب العنوان الأول قبل الفكرة نفسها ؟؟
مرة قرأت للكاتب أحمد خالد توفيق رد على إحدى الرسائل من القراءيسأله فيه القارئ عن قصة اسطورة الكاهن الأخير فقال:
" في الواقع ان قصة اسطورة الكاهن الأخير فكرتها جائت عندما كنت جالساً مع نفسي .. سألت نفسي " لماذا لا أؤلف قصة بعنوان اسطورة الكاهن الأخير؟؟" ثم شرعت في كتابة القصة ..."
في الواقع تعجبت .. فأنا تماما كما يقول احمد خالد توفيق
كتير من الاشياء اكتب عنوانها قبل أن أفكر في فكرتها
ففي منتدى حكاوي الزعفرانة كثير من المواضيع كانت فكرة عنوان قبل أن تكون فكرة في الحياة
..
و السؤال الآن...
حد فكر يكتب عنوان قبل ما يكتب فكرة ؟؟؟
لو حد جرب أكيد هيلاقي شعور جميل جداً
اللي قرأ يجرب ويدعي لي ....

لازم هتنقص حاجة

انا نفسي أنجح في الشغل بتاعي... نفسي أكون فيه top
ونفسي أتجوز بنت الحلال ونجيب أحلى عيال ونربيهم أحسن تربية ونعيش عيشة 100%
نفسي كمان أحقق بجوار طموحي المهني .. طموحي في الكتابة ..
إني اكتب وناس كتير تشاركني أفكاري .. مش مسألة فلوس يعني
نفسي كمان اكون مثقف جداً جداً .. مش عشان حاجة أكتر من أني ما أكونش بطيخة .. انسان لا يفقه شئ في الحياة
نفسي أكون متدين ... عارف ربنا .. بأعبده كأني أره
نفسي .. ونفسي .. ونفسي

نفسي كل شئ يبقى تمام....و لكن!!
زي ما كلنا عارفين الحكمة الأبدية منذ أن خلق الله الأرض ومن عليها :
" محدش بياخد كل حاجة في الدنيا "
ودي حقيقة ..
عشان كده أكيد لازم هتنقصني حاجة من الحاجات دي
بس يا ترى بقى هي إيه؟؟؟؟؟؟؟
بالنسبة لي كل الحاجات دي لازماني جداً جداً... مش عاوز أي حاجة منهم مش عندي
بس مضطر أرضى باللي ربنا هيقسمه لي...
اللهم إني لا أسألك رد القضاء ولكن أسألك اللطف فيه :(
يا رب نقصني في حاجة مش مهمة أوي

فاشل في مداعبة الأطفال

من أكثر الأشياء التي أنا فاشل فيها :
" مداعبة الأطفال"
فاشل فيها بدرجة أمتياز مع مرتبة الشرف
:(

فاشل أصلي.. فاشل كبير .. آخر مرة على سبيل المثال..
جاء صديق متزوج المنزل عندي... وجاء بأبنته عندها سنة ... بنت أمورة جداً وحلوة جداً :)
قال لي صاحبي: " سلم على نورا يابني "
بعبطي مديت إيدي للبنت اللي عندها سنة وقلت لها إزيك ... ( عبيط أنا مش كده )
قال لي : " أيه يابني مالك ... مش بتعرف تلاعب الأطفال ليه ؟؟ أمال لما تتجوز هتعمل إيه؟؟"
قلت له :" ساعتها ربنا يحلها من عنده بقى "
مش بس الموقف ده.. ده نقطة في بحر...
انا مرة ركبت الميكروباص طلعت بنت صغيرة مع مامتها عندها 4 سنين تقريباً...
كانت واقفة في الميكروباص عشان مفيش مكان ...
كانت بنت أمورة أوي.. أوي أوي.. بصت لي وضحكت....
نفضت لها تماما... قربت مني ... بصيت من الشباك ونفضت لها برضه...
وكل شوية تقعد تعمل حركات عشان تلفت انتباهي ..
وأنا برضه منفض لها... بصراحة كان نفسي ألعب معاها بس مش بأعرف :(
كل اللي نفسي أعرفه .. هو أنا كده شرير وقاسي ؟؟؟ و لا فيه كتير كده!!!!!
أنا خايف ابني لما يتولد يكرهني اكمني مش بأعرف ألاعبه ويحب امه اكتر مني..
سلم يا رب :(

الرغاي والكلامنجي

- انت رغاي أوي على فكرة

- ليه بتقول كده؟

- بتتكلم كتير أوي..

- وايه المشكلة

- بتصدعني.. أنت لسانك ده إيه ؟ مش بيتعب؟؟

- أنا لساني هو دليل وجودي.. شخصيتي تعرفها من لساني..

- بس خير الكلام ما قل ودل..

- وأنا مش بأعمل غير كده

- إزاي؟؟ دا أنت رغاي أوي .. بقالك ساعة عمال ترغي..

- بس كلمتك في أكتر من موضوع .. وكل موضوع أتكلمنا فيه بشكل مختصر .. يعني كلام قليل على مواضيع كتير عمل كلام كتير..

- هو أنت يعني لازم تتكلم في مواضيع كتير ؟

- بأحب أقول رأيي وأفكر

- ما تحتفظ برأيك لنفسك يا أخي..

- التفكير زي الرقص.. لازم يكون ليه جمهور

- بس الرقص حرام..

- مش موضوعنا دلوقت..

- بس أنت شبهت بحاجة لا تجوز

- أيوة .. بس كمثال يعني .. يعني مثلاً.. خد عندك لما ربـ...

- خلاص خلاص .. أنت لسة هترغي.. نفض

- هو ده عيبك للأسف

- ايه هو بالضبط؟

- مش بتاخد وتدي في الكلام..

- مش بأحب الرغي..

- على فكرة بقى .... أنت فاهم الرغي غلط خالص..مش كل كلام كتير يبقى رغي..

- إزاي يا فالح .. الرغي كل الناس عارفاه إنه الكلام الكتير..

- لأ طبعاً.. فكرة غلط .. الرغي هو الكلام في الحاجات التافهة .. المملة .. يعني لما تقعد تتكلم ساعة في ماتش كورة .. يبقى أنت رغاي اوي.. لما 2 ستات يرغوا في الطبيخ و العيال يبقوا رغاين .. أما لو قعدت معاك 5 ساعات نتكلم في قضية هامة يبقى ده مش رغي..يبقى كلام مهم ومفيد..

- طيب أنا اسميك إيه؟؟؟ مش لاقي لك صفة غير رغاي.

- لأ.. سميني كلامنجي..

- كلامنجي؟؟ فرقت إيه يا فالح؟؟

- فرقت كتير...

- إزاي؟

- الكلامنجي غير الرغاي.. الكلامنجي محترف في الكلام .. بيتكلم بهدف محدد في موضوع محدد .. الرغاي يتكلم على أي شئ عمال على بطال

- بس أنت ناسي شئ مهم..

- إيه؟؟

- إن الإتنين كلام وبس.. كل فعلهم كلام...

- مش شرط يكون بيتكلم وبس..

- لأ طبعاً.. معروف ان اللي بيتكلم كتير فعله قليل..

- مين قال كده؟؟

- دي قاعدة كل الناس عارفاها...

- ناس مين؟؟ ومين اللي حط القاعدة الساذجة دي...

- آه.. شكلك عاوز تخش في رغي جديد..

- ههههه.. لسة مصر إنه رغي برضه.. براحتك.. بس انا عاوز افهمك حاجة.. ممكن يكون الرغاي كلامه كتير فعله قليل.. بس الكلامنجي عمره ما يكون كده... الكلامنجي بيتكلم عشان يعرف ويخلي غيره يعرف .. الكلامنجي عاوز ينمي عقله وينشط مخه.. .. كلامه بيساعده إنه يفكر .. عكس الصامت .. بيحب يفكر في سره.. الكلامنجي يحب يفكر في صورة حوار بينه وبين شخص.. كلاهما على حق ولكن كل شيخ وله طريقة ..

-...........

- فكر في الكلام ...

- طيب يا ... كلامنجي

حد فاهم ؟؟؟؟

يا هادي

تجربة

أنا عملت مدونة

عملت مدونة..... الكلمة دي عادية ... بالنسبة لناس كتير بس بالنسبة لي مش عادية خالص.. أنا دخت السبع دوخات أول مرة عملت حساب على blogger نسيت كلمة السر.. تاني مرة برضه نسيت كلمة السر .. ساذج مش كده؟؟ معلش المبتدئ دايماً بيفرح بالحاجة اللي بيعملها لأول مرة في حياته ربنا يسهل بقى...


أحمد علاء