عندما يكون البصل هو الأحلى..

لو أنت شغال في غيط بصل ..
وكل شغلك مع البصل من أول ما و عيت على الدنيا لحد ما كبرت ..
مش هتقرف من ريحته ..
لإنك خلاص إتعودت على ريحته النفاذة ... و ربما و الله أعلم يبقى كيفك إنك تشم البصل
يعني اليوم اللي تحس ان الجو نضيف و به روائح عطرة حقيقية ممكن تتعب نفسياً ..
ده غير إنك لازم هتاكل من البصل ده .. لأن طباخ السم بيدوقه

عشان كده لما حد هيقول لك :" البصل ده ريحته تقرف "
هتقول عليه واد هايف و فاشل ...

عليك بتطبيق مثال البصل هذا على كثير من الأشياء في حياتنا...
ناس كتير أوي عايشة في جو سيء سواء مادياً أو فكرياً...
و عمرها ما خرجت للجو النضيف..
و يوم ما يلاقي الناس بتعتبر اللي هو فيه سيء .. يستغرب.. ويفتكر العالم كله غلط..
و هو بس اللي صح....
و يعمل بمبدأ أن العباقرة هم القلة في كل زمان
فلو حمل فكراً أعوج شربه منذ الصغر فهو لا يرى فيه إعوجاج ...
لأن هذا الفكر يسري في عروقه سريان الدم..
شاربه حتى الثمالة و مش شايف قدامه..

و هكذا يظل المسكين واهم أن البصل لا مشكلة فيه ...
و يحارب العالم من أجل إثبات أن البصل ليس كريها هكذا...
و يموت وقد أشرب أتباعه حب البصل...
و هكذا دواليك دواليك

طموحاتك السرية!

من زمان وأنا نفسي أقول نصيحة للجميع..
أوعى حد يتكلم في طموحاته .. يعني أوعى حد يتكلم ويقول هو نفسه يبقى ايه قدام أي حد كده ببساطة..
يعني لو كنت نفسك تكون أنجح مهندس في مصر مثلاً وجه حد سألك نفسك تبقى ايه .. قول له :
" أهم حاجة الصحة والستر ... مش بأفكر في شئ محدد"
ايوة .. أوعى تقول له انك نفسك تكون أكبر مهندس في مصر ...
و كذلك الحال لو واحدة عاوزة تبقى أكبر لاعبة كرة قدم في العالم تقول لأي حد يسألها :
" أنا مش بأفكر في طموحات .. أنا أهم حاجة عندي أتجوز وأخلف وأعرف أعمل المحشي .. وكده يبقى تمام التمام"
ولو أنتقدوك .. وقالوا لك إنك مش طموح وإنك لازم تبقى طموح ..
قول لهم مش مهم ..
سيبك منهم يا عم .. ما دمت طموح من جواك مش لازم يعرفوا يعني..
أما السبب... فده مش سبب واحد .. دي أسباب..



**********************
**********************






أسباب كتير تخليك تحتفظ بأحلامك الكبيرة لنفسك منها:

1- الحسد ..
ناس كتير في مصرنا الحبيبة من ذوي القلوب السوداء ..
لا يتمنى الخير لغيره.. لو شعر أنك طموح سيمصمص شفتيه زي الحموات في الأفلام ويقول: " يا بختك طموح .. مش زيي خايب "

هيحس – لو كان فاشل- إنك احسن منه وعندك طموح وهو لأ....
و الحقد هيشتغل بقى ..
لما كنت في التربية العسكرية .. قال لنا المقدم اللي كان بيدينا المحاضرات كلمة:
" مفيش حد بيحب حد يبقى أحسن منه .. ولا حتى يبقى زيه .. ده حتى مفيش أخ بيحب أخوه يبقى احسن منه أو زيه"
على الرغم من اني معترض على تعميمه للكلام و لكن في نفس الوقت الرجل يتكلم عن فئة عريضة
ملأ الحقد قلوبها ..



2- الإحباط و السخرية ..
لو قلت للناس على أحلامك ممكن ما تحققهاش.. لأنهم هيحبطوك..و هيسخروا منك
و قلت لواحد إنك نفسك تعمل دراسات عليا عشان تحضر دكتوراه مثلا
هيقول لك :
" انت بتتكلم في إيه يعني ؟؟ هي الدكتوراه دي بتعمل حاجة ؟؟ يا بني ركز في الشغل العملي .. الحياة العملية أفضل كتير من 100 دكتوراه .. عندك فلان .. وفلان وفلان ..و فلان وفلان وفلان وفلان ولا واحد فيهم عنده دكتوراه .. هتاخدها انت ليه بقى ؟؟؟ "
و الله الكلام ده بيحصل مش مجرد من خيالي... كل حاجة هتقولها هتلاقي 100 واحد يقول لك 100000 كلمة شكل..
زي جحا و ابنه والحمار.. في الآخر كل ما تيجي تعمل حاجة عزيمتك هتقل ومش هتعمل اي حاجة خالص..

فيه كتير من الناس مخها واقف ... لا يفكر إلا في الذي امامه.. يعني مثلا تخيل ان حلمك تكون من كبار منفذي أفلام الكارتون في العالم .. وجيت تكلم حد من هؤلاء على حلمك .. عارف هيقول لك إيه :
" يا عم كارتون مين .. صلي على النبي .. "
ثم تجده يحكي لأي واحد معدي في الشارع على حلمك ...
فتجد الذي حكى لك ينظر لك باستخفاف و كأنك عبيط ولامؤاخذة
ده غير الأهل اللي مش بيعجبهم العجب ..
عجبني كلام قاله عمرو دياب حول نجاحه حين قال:
" أنا كل حاجة الناس حذرتني من اني اعملها في شغلي عملتها .. و العجيب إنها نجحت جداً"



3- أصحاب العمل..
كتير من اصحاب العمل بيبقى نفسه يشغل واحد معندوش طموح..
عشان لما ياخد الخبرة لا يترك المكان اللي هوه فيه ويروح مكان تاني..
أصحاب العمل عاوزين واحد موظف ... يبقى مربوط في العمل اللي هو فيه وخايف عليه وكل همه انه يقبض اخر الشهر و خلاص...
مرة واحد اعرفه راح عشان يقدم على شغل فسأله صاحب الشغل:
" أنت لو لقيت فرصه بأضعاف أضعاف المرتب اللي احنا هنعطيه ليك هتروح؟؟"
صديقي هذا قال له بكل صدق:
" بصراحة أيوة.. أنا عندي طموحات .. و أي حاجة حاسس إنها أفضل هأروحها "
نظر له من فوق لتحت وقال له :
" هنبقى نتصل بيك "
لو كان صاحبي قال له إنه عمره ما بيفكر في المرتب العالي وإنه ما دام لقى وظيفة يبقى خلاص مفيش مشاكل ..
و أهم حاجة الاستقرار
كان هيقول له :
" بكره ان شاء الله تستلم عملك "


***********************
***********************

الصقر بيحلق في السماء...
بس مش بيقول انه هيحلق..
بيحلق من غير ما يقول لحد..
و الناس بتشوفه بعد ما بقى فوق..
ومش بينزل لتحت....
حلق في السماء بس من غير ما تقول:
" أنا طالع السما"

كلام بدون عنوان

1- مفهوم الثقافة اختلف كثيراً.... الثقافة الآن ليست مجرد ان قراءة كتب.. و ليست مجرد قراءة ايضا
صورة المثقف التي في أذهاننا هي أنه عندما تدخل حجرته تجد الكتب ملقاة هنا و هناك..
صحيح ان قراءة الكتب مصدر اساسي و مهم.. و لكن عن نفسي رأيت الكثير من المثقفين ممن لا يقرأون كتباً..
كل ما في الأمر أنهم يستخدمون الانترنت بكثرة.. فحين لا يعرف شيئاً يدخل على ويكيبديا.. و يعرف عنه كل شئ.. و يرى اشياء مرئية على اليوتيوب.. و يشاهد افلام من جنسيات مختلفة .. كل تلك الاشياء تمده بخبرات و معلومات تجعله يستطيع مجاراة المثقف الذي يفقد قوة بصره من كثرة القراءة .. صحيح انه ليس ذو علم غزير .. و لكنه على الأقل ليس سطحي.. فلم يعد الانسان السطحي هو من لا يقرأ.. بل هو من لا يريد ان يعرف

2- اذا اكتشفت ان لك الكثير من الاعداء.. فأعتقد أنك تسير في الطريق الصحيح.. لا يوجد ناجح بلا أعداء.. الانسان الذي تجد كل الناس تحبه.. او على الاقل ليست تحمل له اي شئ هو انسان مشكوك في انه ناجح.. و انا هنا اقصد ناجح على كل المستويات لا في مستوى معين .. من منا أفضل من محمد – صلى الله عليه و سلم - .. كان – و مازال- له الكثير من الاعداء

3- اذا تم رفضك فلا تشعر انك كرامتك قد اهدرت.. فتذكر انك ايضا ترفض آخرين
لماذا تظن انه لا بد من اجماع عليك؟.. الله بجلاله لم يجمع عليه الناس .. و منهم من رفضه و منهم من سبه و استهزئ به..

4- اكثر ما اكرهه الشخص الذي تجده يمشي مع الرأي السائد في اي حوار يدور امامه.. فتجد مثلا حين يجد امامه من يتكلم عن ان الشباب فاسدين يقول له :" آه طبعا امال ايه .. ده فساد ملوش زي و الله "
و اذا جاء له آخر يكلمه عن ان هناك شباب صالح في البلد يقول له :" اكيد.. ولاد الحلال كتير يا ريس.. احنا نمتلك احسن شباب"
ربما هو ليس منافق.. ولكنه باختصار ليس له رأي.. و لا يحب ان يجعل أحد يزعل منه.. ربما لن يزعل احد منه كما أراد.. و لكن لن يعطي أحداً لرأيه اعتبار.. هذا ان قال اصلا رأي

5- حاول ألا تتجنب الفرص المتاحة قدر الامكان.. فأنت لا تعلم أي عرض ترفضه فيه الخير لك.. من الممكن أن ترفض عزومة من اصدقاءك للخروج للتنزه.. و يكون مقدر لك في تلك العزومة أن تقابل شخص مهم كنت تريد مقابلته .. او أن تجد شخص في المواصلات يتكلم عن شئ كنت تريد ان تعرف عنه شئ ما ... أو ان يدور حديثاً حول شئ تريد ان تعرفه.. او .. او...
انت لا تعلم من اين يأتي الخير

6- من الممكن ان تستفيد من أي شئ تتخيله .. و تتعلم منه..
من الممكن أن تتعلم من برنامج تافه.. من قصة مصورة للأطفال... من مقولة لطفل... أذكر مرة يعقوب الشاروني كاتب الاطفال كتب في مقاله الدوري في الاهرام مقالة عن حكم على لسان بعض الاطفال... كانت حكم رائعة .. استفدت انا منها شخصيا ... كل العباقرة اكتشفوا اكتشافاتهم عن طريق الصدف... نيوتن و التفاحة خير مثال على ذلك
الامر فقط يتطلب منك أن تكون لماحاً

7- " الفلوس بتروح و تيجي... و القتل بيفضل جواك يطارد ضميرك".. عبارة سمعتها في فيلم " الوعد" على لسان محمود يس... كان قاتلاً محترفاً .. يقتل من أجل المال.. و عندما طعن في السن... شعر بتأنيب الضمير .. و شعر أنه غير سعيد بما جناه ..
و بالمثل... أي انسان يسعى للنجاح و المال و السلطة على حساب الصواب.. ربما ينجح... لكن المشكلة أن ما وصل اليه سيذهب... و سيبقى له الشعور بالفساد و الدناءة



الكلام ده نشرته قبل كده في الفيس بوك و المنتدى بس حابب أرجع أدون تاني فحطيته هنا

هل أنت رائع؟!

هل تثق فيمن يقولون أنك رائع؟!
عزيزي.. تأكد أولاً أنهم ليسوا منافقين أو ذوي مصالح..
فذوي المصالح لن يبرحوا مدحك حتى يأخذوا مصلحتهم منك..
تريد أن تتأكد؟
حاول أن تجعلهم يائسين من مصلحتهم تلك التي ينشدونها منك
لو غابوا عنك.. و تركوا مدحك.. فهم المنافقين..
الباقين.. صادقين مخلصين.. و مدحهم لك حقيقي فعلاً..
و لكن..
هل أنت فعلا رائع كما يعتقد الصادقون؟!
هذا يتوقف على عددهم..
فكلما قلوا .. كلما كان عليك أن تشك في حقيقة أنك رائع.. و كلما ازدادوا .. كلما عليك أن تشعر بشئ من الطمأنينة..
و لكن..
ما هي عينة هؤلاء الذين يرون أنك رائع؟!
هل هم ممن يوثق في رأيهم أنه رأي صواب؟!
أم أنهم مجرد دهماء و لا يفقهون شيئاً ... و لا يعرفون من هو الرائع بحق.. و لا يعرفون ما هي الروعة ؟!
ماذا وجدت؟!
لو وجدتهم دهماء و عوام بسيطي العقل و الفكر.. راجع نفسك مرة أخرى.. و حاول أن تستنبط آراء ذوي العقول الموثوق فيها
أما إن وجدتهم أناس ذوي عقول نيرة يوثق في رأيهم.. فأعلم أنك في ورطة
و اصبح عليك عبء كبير..و مسئولية ثقيلة للغاية
عليك أن تحافظ على تلك المكانة التي وصلت اليها في قلوبهم..
كلنا يعرف القاعدة التي تقول :
" الوصول للقمة صعب .. و الأعصب منه الحفاظ عليها"
حاول أن تحافظ على تلك القمة التي وصلت اليها في نفوس من أحبوك؟!

لماذا لا أتكلم عن نفسي؟!

جات لي فترة كده كنت عمال أتهم الناس اللي عمالة تكتب مقالات و مواضيع و تدوينات عن انفسهم
اتهمتهم بأنهم ساذجين و أنهم انانيين لا يفكرون الا في انفسهم .. و أنهم يعملون من الحبة قبة ..
فحين ينجح .. يكتب عن قصة النجاح الاسطوري في الكلية بتقدير مقبول جداً مع مرتبة الشرف
و عندما تتركه حبيبته يتحفنا يوميا بقصائد الوداع و الفراق..
لأ و إيه... يزعل لو ما حدش رد عليه
و تجده يكتب موضوع او تدوينات لا تستطيع بأي حال أن تعلق عليها أو تقول أي شئ.. فيقول فيها مثلاً:
" اللي كان هناك مش موجود دلوقتي"
فماذا تستطيع أن تقول له...
فتترك ما كتب غير مبال به.. و تهمله تماما!!

كنت بالفعل اشعر بمدى سطحية و تفاهة تلك الاشياء
و أخذت على نفسي عهداً ألا أتكلم في أي موضوع يخصني شخصياً..
فلا أكتب حين اشعر ان الدنيا برد و أقول " الدنيا برد أنا بردان بأمووووووت"
و لا حين أستطيع حجز مقعد في الميكروباص أن أكتب عن نجاحي في الظفر به من فم الأسد
و هكذا ...

و لكن بمرور الوقت .. تغيرت تلك النظرة سريعاً... و شعرت أنني أمتلك بعض الاشياء في حياتي تستحق التدوين .. و هي بها من الطرافة ما يؤهلها لأن تمتع آخرين...
و لكن مشكلتي الحقيقية هي أنني أخشى من بعض المتابعين لي على الأنترنت من ارض الواقع..
فلي للأسف زملاء عمل و اقارب و اصدقاء شخصيين مشتركين على الفيس بوك.. و يعرفون طريق مدونتي .. و يعرفون اني عضو بحكاوي الزعفرانة ...
و ربما ما سأكتبه قد يمس شخصاً منهم.. و ربما يتضايق...
فكلما أكتب موقفاً أجد نفسي لا بد أن أذكر شخصاً.. و هذا الشخص للأسف يتابعني على الانترنت..
و لو قرأ ربما لا يعجبه ما كتبت... و ربما اتهمني بأني افشي الاسرار
لذا آثرت السلامة .. و أصبحت أكتب عن أي شيء آخر ... غير نفسي

كم تمنيت أن أتكلم عن نفسي..
و بمناسبة الكلام عن النفس ..يحضرني هنا مقولة لرفعت اسماعيل في كتيب ماوراء الطبيعة رقم 70
القصة عبارة عن برنامج في الراديو... و هذا البرنامج يعمل على مكالمات المستمعين المباشرة.. و تأخرت مكالمة فأضطر المحاور أن يتحدث مع رفعت اسماعيل عن نفسه قليلا كنوع من اضاعة الوقت حتى يأتي أول اتصال...
و حين سأل المحاور رفعت اسماعيل إذا كان متضايقاً انه يتكلم عن نفسه قال له :

" لماذا؟ أنا مستمتع جداً .. أتكلم في الموضوع الوحيد الذي يروق لي فعلاً.. و هو أنا .. و للمرة الأولى أتمنى أن تتأخر هذه المكالمة .. ككل انسان أتمنى أن تصدر جريدة خاصة للكلام عن آرائي في الحياة .. و على صفحتها الاولى اخبار عن استيقاظي من النوم و خروجي من الحمام .. الخ.. انا مندهش لماذا يضيع الناس وقتهم في الكلام عن المال و الفلسفة و السياسة و لا يكرسون حياتهم للكلان عني أنا "


مع الفارق أني لا أريد جريدة تتكلم عن استيقاظي من النوم و دخولي للحمام

اشرب سجاير .. تبقى برنس

دايما في معظم الأفلام بطل الفيلم لما يكون الجامد جداً بيشرب سجاير...
لما يحب يفكر بيشرب سجاير... لما يكون حزين بيشرب سجاير..
المؤلف لما ييجي يكتب قصة يشرب سيجارة في ايده الشمال ويكتب القصة بإيده اليمين
رجل الأعمال وهو بيتكلم مع الشركاء أو العملاء بيشرب سيجار ..
البطل بياخد النفس ويطلعه في وش حبيبته عشان يؤكد لها انه صايع ومفيش منه 2
الكثير من الأدباء يشربون السجائر.. حتى انني سمعت ذات مرة مقولة تقول :" السجائر خبز المثقفين"
أيضاً العبقري يصوروه كثيراً ما يشرب البايب..
سمة من سمات الظابط سواء مخابرات او شرطة او حربي أو أو.. ان يكون مدخن.. و مدخن شره كمان

كل الحاجات دي خلتني بأفكر كتير في السجاير .. بس مش بأشربها
و ان شاء الله مش هأشربها بس مش عارف ليه حاسس انها بتعمل منظر
يعني بقيت لما بآجي اشتغل بأحط القلم الرصاص في بقي وأمسكه بإصبعي السبابة والوسطى
و كل شوية أخرج القلم من بقي وأنفخ هوا
بأحس ساعتها إني بأفكر احسن
نفس الكلام لما بآجي أكتب حاجة ( أصلي بأحب اكتب)
المشكلة ان حواليا كتير اوي مدخنين وعمالين يدعوني للتدخين
الله يمسيه بالخير زميلي في الشغل دايما يقول لي :
" أشرب سجاير تبقى برنس"
و الله بقيت حاسس إني ممكن أضعف لو الاغراء زاد
و مش عارف أعمل ايه عشان اخرج الاوهام دي من دماغي

حدش عنده حل؟؟ :(






كتبته في حكاوي الزعفرانة في 28-2-2009

الملل أحيانا لذيذ

حب تشوف ماتش بين فريقي الحامول وكفر الزيات؟؟
طب تحب تشوف فيلم عربي قديم بطولة عبد الوهاب مدته تلات ساعات ؟؟
تحب تشوف مسلسل عربي عن قصة شاب بيحب فتاة لكنه فقير وأهلها مش راضيي؟
تحب تسمع خطبة لحسني مبارك؟

كلها حاجات مملة جداً .. أنا عارف
كتير هيقول لك أنا لا يمكن أستحمل الملل ده كله
ولكن...
من إحدى هواياتي أن أتابع الأشياء المملة..
لماذا؟
لأن الأشياء المملة مضحكة جداً

أحب متابعة مباراةالحامول وكفر الزيات بشدة..
ففيها سأضحك على اللعب الساذج .. وأيضاً سأضحك على الملعب الذي هو أشبه بالمزرعة..
وعلى الجماهير التي تجلس بالترنج والشبشب كأنها أستيقظت للتو من السرير على الاستاد على طول
وعلى المدرب اللي لابس جلابية


وفيلم عبد الوهاب..
هأضحك على الكلام الحمضان بتاعهم
لما يقول لحبيبته :" أنا مش حابب تكون بيننا علاقة غير شريفة"
ولما يتكلم على المزيكا ويقول :" موسيأى" ( مش موسيقى )
ولما يضحك بطريقة مصطنعة ويقول : ( ها ها ها )
بنفس اللهجة اللي انا كاتب بيها دي بالضبط
هأضحك على الممثل الكومبارس اللي عمال يبتسم للكاميرا..
وعلى زكي رستم لما يقول ( صداقيني يا مديحة)


أما المسلسل العربي.. فهأضحك على الملل .. وعلى عبط المخرج و المؤلف والممثل وسذاجتهم
على التفاصيل العبيطة في المسلسل
وعلى الأحداث اللي بتناقض نفسها

أما بابا حسني فسأضحك على الراجل اللي هيقف ف نص الخطبة يقول:
" يا مبارك قول قول .. إحنا معاك على طول على طول"
وعلى الكلام اللي سمعته في الخطبة اللي فاتت
وعلى تكراره لكلمة :" السلام خيار استراتيجي "

طب تصدقوا بإيه؟
أنا مرة سهرت على فيلم بطولة حسن الأسمر وعايدة رياض لمدة ساعتين
كان فيلم ممل .. عن المخدرات



صدقوني يا جماعة
الحاجات المملة ممتعة جداً
بس لو نصبر عليها





هذا البوست عبارة عن توبيك قديم كتبته في منتدى حكاوي الزعفرانة في 23 نوفمبر 2008 .. أصلي عاوز أنقل عفشي من هناك

فليذهبوا بنواياهم إلى الجحيم

فيه ناس تحب تصطاد في المية العكرة ....
ويحبوا يدوروا على العيوب بتاعة الناس التانية بملقاط....
فيمشي الأخ مع أخته في الشارع ...
ولا حرج أن تتأبط ذراعه...
فتجد شاب الساذج يغمز لصديقه أنهم حبيبة وماشيين مع بعض...
و إذا حدث هذا مع فتاة ووالدها فالسذج يقولون:
" شوف مصاحبة واحد قد ابوها ازاي؟!!"
وحينما يشيد ولد في منتدى أو على الفيس بوك أو ما شابه بشئ كتبته فتاة قد يظن الساذج
أن هذا العضو بيلمح لشئ مش ولا بد..... أو أنه يحبها .. أو معجب بها و يريد ان يتزوج منها ( و تلك حقيقة و حدثت أمامي)
وحينما تساعد فتاة شاباً زميلها في شئ ما يفترض البعض انها تحبه وأنها ترسم عليه......
وحين يسألها عامله ايه النهاردة......
يبقى واد لعبي وبتاع بنات....
دا أنا مرة كنت ماشي في الشارع انا واصحابي بنتكلم عن حاجة كده مش فاكرها
فقلت لهم أن هذه الحاجة دي جميلة...
فقالوا لي "لا .. مش جميلة"
قمت اتكلمت بصوت عالي شوية وقلت:
" والله ياعم جميلة .. والله جميلة"
قامت واحدة معدية من جنبنا أفتكرتنا بنعاكسها...
وقعدت الناس تغمز لي في الشارع... وكنت في نص هدومي..
المشكلة أنه نفسه من يفعل ذلك ربما تجده يتهم الآخرين بالفضول و خبث النية حين يحدث له موقف مشابه
و تجد البعض الآخر منهم يطالبك بأن تعمل للناس ألف حساب.. فحين تمشي مثلا مع أختك إياك أن تضحك ..
فليكن التكشير شعارك... و حين تتعامل مع فتاة خد بالك الناس مراقباكم
كأنني أعيش للناس .. فليذهب هؤلاء للجحيم
و الله ليس لك إلا أن ترفع الشعار الذي يقول :
" لست ملزماً لأن تثبت لأحد أي شئ"






هذا البوست موضوع قديم كتبته في شمساوي 13 مارس 2008 تحت عنوان " سفراء النوايا القذرة" و لكن مع بعض التعديل حتى يناسب العصر اللي إحنا فيه :D

حتى الصقر.. لم يأخذ كل شئ

"لا يمكن أن تأخذ كل شئ .. لا بد أن ينقصك شئ"

تلك القاعدة هي من المسلمات في الحياة.. بالطبع لا يمكن لبشر مهما اوتي من اسباب ( الا الانبياء) أن يصل للكمال في كل شئ... و ايضا الحيوانات
و بمناسبة الحيوانات .. فقد فكرت في كمال طائر الصقر.. و أكتشفت أنه غير كامل بالمرة ...
ربما يسأل البعض ما اوجه النقص في الصقر؟
الصقر كائن مهيب كبير و عظيم ... قوي.. شكله جميل
ما عيوبه؟
حين بحثت عن معلومات حول الصقر .. اكتشفت في أول سطر أن أنثى الصقر إذا كان ابنها الخارج من البيضة ضعيف فانها تلقي به الى الصغار الاخرين .. أو تتركه بدون طعام حتى يموت..
أول القصيدة كفر ..
ثم فكرت بعد ذلك حين عقدت مقارنة بين العصفور و الصقر..
وسألت نفسي.. هل الصقر افضل من العصفور؟ هل العصفور يمتلك ما يميزه عن الصقر؟
العصفور يحبه الجميع... مشهد العصفور في الشارع.. او على حافة النافذة .. او في التلفاز .. او في الفقص او في أي مكان.. يثير في القلب البهجة ..
مشهد الصقر في التلفاز و في الصور وفي حديقة الحيوان يثير في روحنا العظمة .. فننظر اليه ونقول :
" الصقر ده حاجة جامدة "
و لكنك بالطبع لن تربيه في بيتك... لأنه غالي أولاً.. و مخيف ثانياً..
و بالنسبة لي .. أخاف ان أربي صقر في منزلي .. منظره غير مريح..
يكفي ان من يربيه لا بد له ان يلبس جورب يغطي يده الى المرفق
حتى من يربيه يخاف من مخالبه...
لا يمكن أن تجد طفل يجري وراء صقر.. لأنه لن يراه اصلا
ولكنه من الممكن ان يجري وراء عصفورة .. فهي حوله في كل مكان و شكلها جميل
الصقر لا يشارك الناس ... و العصفور يشاركهم دوماً..

لهذا فالصقر غير متكامل ... نعم يشعر بعظمته الكثير ولكن قله من تحبه حقاً كالعصفور

Ed Wood

اوحش حاجة بجد ان الانسان يعيش في وهم و يقعد فيه فترة طويلة مش فاهم انه موهوم...
بالذات في مسألة مثل الموهبة ... ممكن انسان يظن انه موهوب في شئ ما .. و انه خلق من اجل ان يبدع في هذا المجال.. و هو في الحقيقة يصلح لأي شئ آخر الا هذا الشئ
انا مثلا بأحب اكتب.. بس في الواقع خايف اكون موهوم.. و عشان كده بيهمني جداً أني أعرف اذا كنت موهوب و لا بيتهيأ لي
بمناسبة الموضوع ده فيه فيلم اسمه Ed Wood بطولة المبدع Johnny Depp..
الفيلم ده اصلا فيلم عن قصة حياة أسوأ مخرج في تاريخ امريكا.. و من منحه اللقب هو عن طريق تصويت قاموا به.. و للعجيب انه اكتسب شهرة و معجبين بسبب فشله..
زي مثلا لما واحد اشتهر بأنه بيقول نكت بايخة.. فالناس تضحك على عبطه وليس على طرافة النكت بتاعته
المخرج اسمه Ed Wood.. الراجل ده كان مخرج فاشل بكل ما تحمله الكلمة من معان.. لا يفقه شئ في الاخراج.. و برغم كده عاش طول عمره في دور العبقري.. و عمال يعمل في افلام فاشلة للصبح
و مات سنة 1978 و هو لسة فاشل..
بجد واحد زي ده كيف لم يشعر طوال تلك المده انه فاشل....
لا اعرف ان كان هذا هو الغباء ام العند
و ربنا ما يكتب علينا أن نعمى عن حقيقة انفسنا مثل هذا الرجل