من زمان وأنا نفسي أقول نصيحة للجميع..
أوعى حد يتكلم في طموحاته .. يعني أوعى حد يتكلم ويقول هو نفسه يبقى ايه قدام أي حد كده ببساطة..
يعني لو كنت نفسك تكون أنجح مهندس في مصر مثلاً وجه حد سألك نفسك تبقى ايه .. قول له :
" أهم حاجة الصحة والستر
... مش بأفكر في شئ محدد"
ايوة .. أوعى تقول له انك نفسك تكون أكبر مهندس في مصر ...
و كذلك الحال لو واحدة عاوزة تبقى أكبر لاعبة كرة قدم في العالم تقول لأي حد يسألها :
" أنا مش بأفكر في طموحات .. أنا أهم حاجة عندي أتجوز وأخلف وأعرف أعمل المحشي
.. وكده يبقى تمام التمام"
ولو أنتقدوك .. وقالوا لك إنك مش طموح وإنك لازم تبقى طموح ..
قول لهم مش مهم
..
سيبك منهم يا عم .. ما دمت طموح من جواك مش لازم يعرفوا يعني..
أما السبب... فده مش سبب واحد .. دي أسباب..
**********************
**********************
أسباب كتير تخليك تحتفظ بأحلامك الكبيرة لنفسك منها:
1- الحسد ..
ناس كتير في مصرنا الحبيبة من ذوي القلوب السوداء
..
لا يتمنى الخير لغيره.. لو شعر أنك طموح سيمصمص شفتيه زي الحموات في الأفلام ويقول: " يا بختك طموح .. مش زيي خايب
"
هيحس – لو كان فاشل- إنك احسن منه وعندك طموح وهو لأ....
و الحقد هيشتغل بقى
..
لما كنت في التربية العسكرية .. قال لنا المقدم اللي كان بيدينا المحاضرات كلمة:
" مفيش حد بيحب حد يبقى أحسن منه .. ولا حتى يبقى زيه .. ده حتى مفيش أخ بيحب أخوه يبقى احسن منه أو زيه"
على الرغم من اني معترض على تعميمه للكلام و لكن في نفس الوقت الرجل يتكلم عن فئة عريضة
ملأ الحقد قلوبها ..
2- الإحباط و السخرية ..
لو قلت للناس على أحلامك ممكن ما تحققهاش.. لأنهم هيحبطوك..و هيسخروا منك
و قلت لواحد إنك نفسك تعمل دراسات عليا عشان تحضر دكتوراه مثلا
هيقول لك :
" انت بتتكلم في إيه يعني
؟؟ هي الدكتوراه دي بتعمل حاجة ؟؟ يا بني ركز في الشغل العملي .. الحياة العملية أفضل كتير من 100 دكتوراه 
.. عندك فلان .. وفلان وفلان ..و فلان وفلان وفلان وفلان ولا واحد فيهم عنده دكتوراه .. هتاخدها انت ليه بقى ؟؟؟ "
و الله الكلام ده بيحصل مش مجرد من خيالي... كل حاجة هتقولها هتلاقي 100 واحد يقول لك 100000 كلمة شكل..
زي جحا و ابنه والحمار.. في الآخر كل ما تيجي تعمل حاجة عزيمتك هتقل ومش هتعمل اي حاجة خالص..
فيه كتير من الناس مخها واقف ... لا يفكر إلا في الذي امامه.. يعني مثلا تخيل ان حلمك تكون من كبار منفذي أفلام الكارتون في العالم .. وجيت تكلم حد من هؤلاء على حلمك .. عارف هيقول لك إيه :
" يا عم كارتون مين
.. صلي على النبي 
.. "
ثم تجده يحكي لأي واحد معدي في الشارع على حلمك ...
فتجد الذي حكى لك ينظر لك باستخفاف و كأنك عبيط ولامؤاخذة
ده غير الأهل اللي مش بيعجبهم العجب ..
عجبني كلام قاله عمرو دياب حول نجاحه حين قال:
" أنا كل حاجة الناس حذرتني من اني اعملها في شغلي عملتها .. و العجيب إنها نجحت جداً"
3- أصحاب العمل..
كتير من اصحاب العمل بيبقى نفسه يشغل واحد معندوش طموح..
عشان لما ياخد الخبرة لا يترك المكان اللي هوه فيه ويروح مكان تاني..
أصحاب العمل عاوزين واحد موظف ... يبقى مربوط في العمل اللي هو فيه وخايف عليه وكل همه انه يقبض اخر الشهر و خلاص...
مرة واحد اعرفه راح عشان يقدم على شغل فسأله صاحب الشغل:
" أنت لو لقيت فرصه بأضعاف أضعاف المرتب اللي احنا هنعطيه ليك هتروح؟؟"
صديقي هذا قال له بكل صدق:
" بصراحة أيوة.. أنا عندي طموحات
.. و أي حاجة حاسس إنها أفضل هأروحها "
نظر له من فوق لتحت وقال له :
" هنبقى نتصل بيك
"
لو كان صاحبي قال له إنه عمره ما بيفكر في المرتب العالي وإنه ما دام لقى وظيفة يبقى خلاص مفيش مشاكل ..
و أهم حاجة الاستقرار
كان هيقول له :
" بكره ان شاء الله تستلم عملك
"
***********************
***********************
الصقر بيحلق في السماء...
بس مش بيقول انه هيحلق..
بيحلق من غير ما يقول لحد..
و الناس بتشوفه بعد ما بقى فوق..
ومش بينزل لتحت....
حلق في السماء بس من غير ما تقول:
" أنا طالع السما"
فكرة حلوة يمكن لما ادارى حاجتى اعرف احقق حاجة بس من الاسباب اللى عجبتنى فعلا هو السبب التانى...يمكن عشان معتقدش ان فى حد ممكن يحسد على حلم يا عالم ممكن يحققه ولا لا
ردحذففعلا اكتشفت مؤخرا ان فيه ناس وحشه جدا بجد
ردحذفوللأسف اكتشفت ان واحدة صاحبتي كده
كل اما احكيلها على شيئ بلاقيه يبوظ على طول
وان مباظش بحس اني مخنوقه اعمل الشيئ ده
وقررت ان بعد كده مبقيتش ححكي عن شيئ الا لما يحصل الاول :)
عجبني النوت ده وعجبني الراي ده فيه كتير من الواقع فعلا
ردحذف