بيأكلوا بكام.. حول العالم

بمناسبة رمضان... قرأت خبر في مصراوي .. ان المصريين بيستهلكوا أكل بمعدل 200 مليار في السنة
قلت أشوف الناس التانية بتستهلك قد ايه..
عملت بحث و حركات في عشر دول.. منها مصر
و في الاخر توصلت لموقع حلو اوي كل بلد و يسأل اسرة متوسطة فيها على معدل الاستهلاك في الاسبوع .. و النتايج كانت كالتالي :



1- ألمانيا: رقم واحد في القائمة و أكتر ناس بيستهلكوا.. و لا أعرف اذا كان ده بسبب ان الاسعار عندهم غالية و لا انهم طفسين؟؟ بس اعتقد عشان غلو الأسعار .. عائلة عددها اربع افراد يأكلون ب$500.07 اسبوعيا

2- الولايات المتحدة الامريكية: اربع افراد يأكلون ب $341.98 اسبوعياً.. اعتقد السبب برضه عشان الاسعار اكتر منها الطفاسة

3- اليابان: اربع افراد ب$317.25 اسبوعيا

4- ايطاليا : 5 افراد ب $260.11 اسبوعيا

5- المكسيك : 5 افراد ب $189.09 اسبوعيا

6- بولندا: 5 افراد ب $151.27 اسبوعيا

7- مصر: احنا بقى ناس جامدة .. عائلة في الصعيد مكونة من 12 فرد بيأكلوا ب$68.53 اسبوعيا.. تحيا مصر

8- الاكوادور: ناس غلابة 9 افراد بياكلوا ب $31.55 اسبوعيا.. كده احنا مش افقر ناس و لاحاجة

9- بوتان: ناس اغلب من الغلب نفسه 13 فرد بيأكلوا ب $5.03 دولار اسبوعيا


10- تشاد: طبعا دي اوقع ناس في العشرة .. 6 افراد يأكلون ب$1.23 اسبوعياً... و لا حول ولا قوة الا بالله ..

المصدر

الرخامة دي هواية!

أعرف نوعية من البشر .. عشقها الأول والأخير .. السخرية من الآخرين
بأي شكل .. و تحت أي ظرف
لا يستطيع أحدهم أن ينام مرتاح إلا وقد قام بكام حركة رزالة وغتاتة على الماشي
ويا ريت مثلاً يسخر و يمزح ويرخم ويغتت مع أصدقاءه المقربين
بل يسخر من ناس لا يعرفهم.. وللأسف .. ناس مساكين جداً وغلابة و حالتهم صعبه
كانت لي في الثانوية صداقة مع 2 من هؤلاء..
كنت أمشي معهم في الشارع فيجدون رجلا عجوزاً يمشي بصعوبة فيقولون :
" يا جدو"
" هو أنت لسة عايش ؟ .. العهد الملكي خلص يا حاج"
وكان أكثر نوع من السخافة يستهويهم السخرية من كبار السن .. في أي مكان
وبالطبع فرصه ذهبية للسخرية من المعوقين ذهنياً .. فتجده يفعل به أفعال تفطس من الضحك
هذا غير عمل المقالب السخيفة كأن يلقوا بك في الطين بدون مقدمات ( وده أقل درجات الهزار عندهم )
وأن يلقوا بنظارتك الجديدة الغالية أو بالجاكت الجديد في الشارع من الشباك ..
وحين تتكلم معهم مثلاً في أمر ما.. كأن تشكو ضيقك من مدرس الفصل ..
تجده يقوم - في نفس اللحظة - فجأة وهو يضحك ويقول للمدرس :
" يا أستاذ .. الواد ده بيقول عليك كذا وكذا "
ثم يضحك الفصل .. ويشعر أنه حرر القدس..
في الواقع لا أعرف لماذا يفعل هذا ؟
ولماذا ليس في قلبه مثقال ذرة من رحمة وشفقة على من يسخر منهم؟
لماذا يدمن السخرية إلى هذا الحد؟
و لماذا لا يفرق في السخرية بين موقف وآخر وشخص وآخر؟
و الله في الصف الأول الثانوي حصلت قصة أتألم حتى الآن كلما أتذكرها ..
كان عندنا أستاذ شيخ كبير .. اسمه مجد الدين .. رجل فضيل ..
طيب و فقير لدرجة أنه ليس لديه سوى طاقم واحد يلبسه دوما ..
قمة في الضمير التعليمي.. فكان دوما لا يغيب..ولو سأله أحد يفني نفسه من أجل إجابته
وحتى في الأيام الأخيرة من الدراسة ( التي لا يذهب فيها أحد للمدرسة إلا القليل جدا جدا ) كان يذهب ويشرح لهؤلاء القلة ..
ودوما الابتسامة على وجهه
وفوق كل هذا عنده عيب خلقي .. يده اليمنى تنقصها الإصبع الإبهام ..
فأصابع يده أربعة فقط..
فكان يمسك الطباشير بصورة مضحكة ..
وكان عندنا واد( من إياهم ) بس كان واد مصيبة ..
كلما يخرج الإستاذ.. يخرج هو ويمسك الطبشورة ويكتب مثله على السبورة ..
والفصل يضحك .. الكل يضحك
وكان هذا الفتى وشركاه يسخرون من نبره صوته العجوز.. وكلامه القديم و ملابسه التي لا تتبدل أبداً
حتى أن أحدهم ضربه بالنبلة في حصة من الحصص..
فبكى الأستاذ والله ..
وحتى في بكاءه سخر منه هذا الفتى وشركاه..
وحين شوح بيده وهو يتكلم عن تلك الفعلة المشينة ( وهي ضربه بالنبله )
ضحك الفصل .. لأن منظر يده كان مضحكا ( فهي أربع صوابع فقط)

وظللنا هكذا نضحك على سخرية الواد وليد على أستاذ مجد الدين..

و لا حول ولا قوة الا بالله

المهم اني كتبت

كنت بأزعل اوي زمان لو محدش علق على حاجة بأكتبها او تجاهلها
دلوقتي مبتقش تفرق معايا
كنت زمان لما الاقي حاجة كاتبها مفيهاش ردود اخش اقول
" فين الردود .. انتوا منفضين لي ليه "
دلوقتي مش فارقة معايا خالص
لأني قررت أن اكتب لنفسي ... لو محدش قرأ يبقى مش مشكلة .. عادي.. انا اسمي حطيت فكري قدام الناس..
و مفيش حد كل حاجة بيقولها لازم الكل يهتم بيها
لو حد قرأ و ماردش.. مش مشكلة ... اهم حاجة انه يكون فهم انا عاوز ايه .. و اتمنى اني افيده
اما لو قرأ و علق..
خير و بركه .. و يشكر
و بكده حسيت أني بقيت بأكتب بصفاء ذهن مش مهتم حد يقرأ او لا... المهم اني مش أبطل كتابة..
لانها حاجة بأحبها ...

أجدع أصحاب ..أصحابي من صغري

"أجدع صحاب .. صحابي من صغري.. هما اللي يمشوا معايا دوغري "
الجملة دي من أغنية .. مش فاكر مين غناها...
بس بجد مش عارف ليه بقيت حاسسها اوي اليومين دول ...
صحابي من صغري اللي بأتكلم عليهم هم اصدقاء الثانوية العامة ... 5 اصدقاء تقريباً
كنت معاهم في الثانوي ...كانوا اصدقاء ليا احسن اصدقاء.. و كلنا دخلنا مع بعض كلية واحدة
كلية التجارة
و قضيناها 4 سنين..
بعد ما أتخرجت مش عارف ليه حسيت اني مخنوق منهم
بقيت مش عاوز اشوفهم كتير... مش عاوز اقعد معاهم كتير..
بقيت بأتهرب منهم كل حين و الآخر!!!
حد يسألني ليه ... هأقول مش عارف ...
بس أظن ان المشكلة كلها في اني كنت عاوز اعرف ناس تانية.... ناس جديدة
كنت اعرفهم هما وبس.. ومليش اصحاب غيرهم
حسيت اني بكده هأكون منغلق على نفسي .. لازم اعرف ناس غيرهم عشان خبرتي بالحياة تزيد
سبتهم فترة... و اقصد بكلمة " سبتهم" مش إني هاجرت .. أو قاطعتهم ..
بس كل الفكرة اني بقيت مش بأقابلهم زي زمان...
كنا زمان نتقابل مرة كل اسبوع على الاقل....
بقت مرة كل شهر او اتنين
اتصاحبت على ناس تانية....
قعدت في الصحوبية مع الناس التانية دي لمدة سنة او سنة و نص تقريباً
بجد حسيت الفرق الرهيب...
اكتشفت فعلا قد ايه انا كنت مصاحب اجدع اصحاب... و اكتر ناس فاهماني و تتمنى لى الخير
اكتشفت قد ايه انا كنت مصاحب ناس قلبهم من جوة ابيض
انا لما سبتهم عرفت ناس كتير قلبها من جوه مش نقي زي قلب اصحابي
اللي منهم طماع و يتمنى يكون احسن منك
و اللي منهم متفوق بس للاسف يا خسارة .. دايما يحاول يثبت لك انه احسن منك ..
و اللي مصاحبك عشان تبقى عامل زي جهاز التسجيل... يتكلم معاك في مشاكله .. بس انت ما تتكلمش معاه في مشاكلك..
و اللي انا حسيت انه كويس بس للأسف نفض لي و عمل فيها لطيفة و قال :
" انا حواليا كتير .. مش ناقصاك انت كمان يا عم الامور"
و اللي تكتشف انه اخلاقة زبالة .. و معندوش قيم و لا مبادئ .. واحيانا معندوش دين
و اللي
و اللي
كتير اوي من النماذج اللي مش كويسة ...
و دلوقتي و من كام يوم بس بقيت بأحاول ارجع لهم من تاني... و لما رجعت لهم لقيتهم لسة زي ما هما
جدعان طيبين .. اوي اوي... و قلوب مليانة خير

انا أول ما معت أغنية :" أجدع صحاب صحابي من صغري" قلت لواحد صاحبي كان قاعد معايا :
" ايه العبط ده .. "
دلوقتي بجد عرفت قد ايه الجملة دي صح
معايا على الأقل...

و كان نفسي اسألكم سؤال...
هو انتوا برضوا حاسين ان اجدع صحاب هما اصحابكم و انتوا صغيرين؟؟؟ و لا أ،ا بس اللي كده